سمعت عن أن مصر هتطرح سندات دولارية قريب عن طريق وزارة المالية ، وفيه 5 بنوك استثمار دولية بدأت تروج للسندات ديه.
الكلام ده قالته وزارة المالية من ساعات قليلة ، وأكدت أن الطرح ده هيتم عشان توفير السيولة من النقد الأجنبي ومواجهة أزمة نقص العملة الصعبة.
طيب تعالي نقولك الأول يعني ايه سندات دولارية اللي الحكومة عاوزة تطرحها ، السند ببساطة فيه شبه من شهادة الاستثمار الي البنوك بتبيعها للمواطنين وبتديهم فوائد عليها لمدة محددة ، ولكن الفرق أن السند شهادة بتبيعها الحكومة أو الشركات مش البنوك وعادة بيتم البيع ده في البورصة، وبترجع للي بيشتريها قيمتها بعد ما تنتهي مدتها بالإضافة لفوائد عليها، يعني تقدر تقول كده سلفة مؤقتة.
وتسميتها بالدولارية سببه أن السلفة ديه بتكون بالدولار مش بالجنيه ، ولكن فيه نوع تاني بتطرحو الدولة أو الشركات أسمو السند المحلي والفرق ما بينهم أن المحلية بتستلف فيها الحكومة بالجنيه وبتطرحها جوا مصر بس ، أما السندات الدولارية بتكون طبعا بالدولار وبتتباع في دول كتير .
والسببب اللي الحكومة بتطرح عشانو السندات ديه ، أنها بتبقي محتاجة دولارات في البلد بسرعة عشان تستخدمها في حجات كتير زي استيراد السلع الضرورية ، فا بتضطر بدل ما تدخل في دوامة القروض وشروطها اللي أوقات بتبقي شديدة وإجراءاتها طويلة ، أنها تستلف عن طريق السندات واللي بتتميز كمان أن مدة سدادها طويلة ممكن تعدي 10 سنوات.
طيب هي السندات الدولارية ديه مفيدة للاقتصاد ولا لا، اللي لازم تعرفه أن طرح السندات ديه هيقدم حلول سريعة للاقتصاد المصري وهيوفر تمويلات مش هتعرف تجيبها مصر بسرعة ، بالإضافة إلى أن الفوائد اللي هتدفعها الحكومة عن السندات ديه واللي مش هتعدي 6.5% هتتجاب عن طريق زيادة الاستثمارات الأجنبية وبالتالي زيادة الصادرات، يعني تقدر تقول كده أن السندات ديه سلفة محسوبة بذكاء.
إقرأ أيضًا
الحكومة هتساعد الشباب بخريطة الاستثمار الصناعي إزاي؟
مفأجاة الحكومة لتخفيض أسعار الذهب في مصر
