أكيد محدش بيبقي مبسوط لما بيخرج من باب بيته يلاقي الزبالة مالية الشارع ، لأن ولا هو منظر حلو ليك ولا لمصر قدام العالم، طيب أيه المشكلة كتير مننا ممكن يرمي اللوم على شركات النظافة بس، ولكن سلوك البعض الخاطيء سبب كبير في أننا نشوف المنظر ده.

في البداية عاوز أقولك حجم اللي بتصرفه الدولة على النظافة، آخر إحصائيات في الموزانة العامة للدولة حددت المبالغ ديه بـ 2مليار و 187 مليون جنيه، ولكن رئيس جهاز المخالفات قال أن الرقم الحقيقي هو 3 مليار و 100 مليون جنيه، والسبب اللي خلى المشكلة تتفاقم آخر كام سنة هي إعدام الخنازير في 2009 بعد إنتشار مرض إنفلونزا الخنازير واللي 80 % من المخلفات العضوية كانت بتروح لمزارع الخنازير.
وحل مشكلة القمامة اللي في الشارع جزء كبير منه عليك وجزء تاني على الدولة ، فمثلا أنتا بلاش ترمي الزبالة في الشارع ووديها لأقرب صندوق منك، وكمان بعض الناس اللي بتسرق صناديق الزبالة وبتحطها في بيوتها فانتا كده بتأخد فلوس ناس كتير أوي عشان كل الفلوس ديه مصروف عليها من الموازنة العامة اللي هي فلوسك وفلوسي.

والحكومة بدأت فعلا تعمل حاجة مهمة جدا، وهي منظومة إلكترونية جديدة لرصد المخلفات وإزالتها،وديه هيبقي البداية فيها بمحافظة القاهرة كتجربة ، وعن طريق المنظومة ديه تقدر تصور الزبالة في أي مكان في الشارع وتبعتها للجهة الحكومية عشان تيجي تشيل القمامة من المكان.

وحاجة مهمة كمان لازم تعرفها ، أنه من كام يوم الغرفة التجارية بالجيزة أعلنت عن مبادرة أسمها ” شنطة صديقة للبيئة” والشنطة ديه بتتحلل عن طريق الهواء واشعة الشمس أو درجة الحرارة ،وهيتم توزيعها في بعض المناطق مجانا قبل ما تبقي حاجة الناس كلها هتستعملها.

إقرأ أيضًا

الحكومة هتبطل تستورد إطارات السيارات من برا ليه؟؟