تأجير تمويلي | نفسك تعمل مشروع بس مش معاك فلوس… متسودهاش في وشك فبل ما تفكر في حلول لأن فيه نظام في البلد بيخليك تأجر مشروع جاهز بالكامل وتدفع الإيجار كل سنة وممكن لما تحقق أرباح تشتري المشروع كله ويبقي ملكك، طيب ايه النظام ده؟

فيه نظام في البلد أسمه تأجير تمويلي وده ببساطه معناه أنك تروح لشركة بتشتغل في النشاط ده وتطلب تمويل شراء مشروع معين مقابل أنك تدفع إيجار على دفعات دورية ، وهتفضل تستثمر في المشروع لحد ما توصل لـ 75 % من العمر الافتراضي للأصل، والمشروع ده هيفضل ملك الشركة اللي مولتك لحد ما يخلص عقد الإيجار ووقتها هيبقي ليك الحق أنك تشتري المشروع أو ترجعه تاني.

والنظام ده مش جديد في مصر ولكنه بدء العمل بيه من سنة 2010 وكان الهدف وقتها أن الحكومة عاوزة توسع حجم المشاريع الصغيرة والمتوسطة في البلد عشان تحسن من الاقتصاد ، وكمان فيه دول كتير بقالها عشرات السنين شغالة بنشاط التأجير التمويلي زي مدغشقر مثلا واللي أكبر بنك فيها بيتشغل بنظام تأجير التمويل عشان يساعد صغار المزارعين على اقتناء الأصول الرأسمالية ، وكمان بنجلاديش واللي بقالها أكتر من 20 سنة شغالة بالنظام ده.

الحكومة هتبطل تستورد إطارات السيارات من برا ليه؟؟

 

طيب وممكن أخد منين تمويل بالشكل ده ، رئيس هيئة الرقابة المالية قال أن عدد شركات التأجير التمويلي المسجلة في الهيئة وصل إلى 224 شركة ، وفيه أماكن كتيربتشتغل في التأجير التمويلي زي شركة هيرمس وكيو إن بي وكمان معظم البنوك بقى عندها إدارات بتشتغل في التأجير التمويلي زي البنك الأهلى والمصرف المتحد.

والحكومة بتستفاد كتير من النظام ده وهو أنها بتشجع الاستثمار في البلد والإنتاج وده معناه تقليل الأستيراد و ، ده غير أن المشاريع اللي هتتعمل بالشكل ده هتساعد أنها تشغل عمالة كتيرة بدل من حجم البطالة واللي وصل في آخر إحصائيات إلى 3.6 مليون عاطل، وطبعا الدولة عاوزة ترفع من معدلات الإنتاج الصناعي في البلد عشان يساهم في الناتج الإجمالي المحلي لمصر بنسبة 21% بدل النسبة الحالية واللي متتعداش 17.7%، وده عشان تعرف تزود حجم صادراتها بحوالي 10 % خلال الفترة اللي جاية .