يعني إيه الشمول المالي؟

يعني إيه الشمول المالي | تعرف أنك لو روحت بنوك كتير اليومين دول هتفتح حساب ببلاش من غير أي مصاريف أو حد أدني للحساب، وده بمناسبة الاحتفال بيوم الأدخار العالمي وإعلان البنك المركزي عن مبادرة الشمول المالي. والشمول المالي ده بيقصد بيه إتاحة خدمات البنوك المالية لكل فئات المجتمع وده بيتضمن حسابات التوفير والحسابات الجارية وخدمات الدفع والائتمان والسبب الرئيسي إن الدول تعمل يوم لحاجة زي كده هو انخفاض اعداد المتعاملين مع البنوك على مستوى العالم و زي ما البنك الدولي قال في تقرير ليه إن فيه حوالي 2.5 مليار نسمة في العالم مش بيتعاملوا مع البنوك منهم 75 % من الفقراء. والحسابات البنكية زي ما هي مفيدة للاقتصاد مفيدة للمواطن من الدرجة الأولى، لإنها بتشجع على الإدخار وغير إنها بتدي للعميل حقوق إنه ياخد فوائد على فلوسه وكمان تمويلات وطبعا هي أمان ليك من الدرجة الأولى، وده مش الفائدة الوحيدة من فتح الحسابات في البنوك ولكن لو بصينا على الفلوس دي بيتعمل بيها ايه هتلاقي إن البنك بيستثمرها في حاجات كتير زي إنه يقرض العملاء ورجال الأعمال عشان يعملوا مشاريع جديدة ويستفاد بالفوائد اللي بياخدها ، ده غير إن البنوك كمان بتدخل شريك في مشروعات كتير بمليارات عن طريق حاجة إسمها صناديق الاستثمار، وكل ده معناه إن فيه فرص شغل أكتر هتتتوفر في البلد لإن أي استثمارات جديدة بتحتاج عمالة تشتغل وده هيقلل البطالة اللي وصلت إلى أكتر من 3 مليون شاب. إقرأ أيضًا

الحكومة هتساعد الشباب بخريطة الاستثمار الصناعي إزاي؟