السيسى لرجال الأعمال: كفاية تضيع وقت ومجمع إنتاج الكوارتز فرصة للاستثمار

أكد الرئيس عبد الفتاح السيسي،على إن مجمع إنتاج الكوارتز يمثل فرصة استثمارية يجب استغلالها من قبل رجال الأعمال .

وقال أنه عندما خدنا القرار ده من 3 سنين، وقلنا نتحرك فيه قالوا ما تدوا فرصة للناس تعمله، وإحنا محتاجين إن كل الفرص تبقى موجودة معانا.

وأضاف الرئيس السيسي، خلال افتتاحه مجمع إنتاج الكوارتز بالعين السخنة: “الناس قالت 700 مليون دولار كتير للمشروع، وإحنا بنطلع نجيب بمليارات الدولارات حاجات أخرى، الرقم مش بسيط ولكن الرقم ده ولا حاجة بالنسبة للأرقام التانية اللي بنجيب بيها، أنا لو طلعت المادة الخام واشتغلت عليها، هشغل الناس وهعظم الإنتاج”.

وأضاف الرئيس السيسي: “أنا بقول لكل الناس والصندوق السيادي والبورصة المصرية، الحاجات اللي بنفتتحها متاحه للمستثمرين المصريين والأجانب، متاحة إنها تتطرح في البورصة علشان ندي فرصة للمواطنين أن يجدوا فرصة للاستثمار في مجالات أخرى وبعوائد مضمونة وهي فرصة أن يستفيدوا بأموالهم بشكل كبير”.

السيسى للمستثمرين الأجانب إحنا معاكم

وفي حديثه للمستثمرين الأجانب، قال الرئيس السيسي: “إحنا معاكم علشان تخشوا.. ولو عايزين تخشوا لوحدكم تمام، أنا قلت الكلام ده من أول مشروع الرمال السوداء، المشروعات كلها متاحة لكم تعالوا، المشاريع دي استثمارية بتجيب عوائد مستقرة سواء للسوق المصري أو الخارج وبالعملة الحرة”.

وأكد الرئيس السيسي، أن الدولة المصرية تحاول تعظيم الهيئة المصرية العامة للثروة المعدنية، قائلا “بندرس كويس جدا إزاي نعظم الهيئة المصرية، لتكون أكثر فاعلية وحركتها أكثر أمام البيروقراطية”.

رسائل الرئيس لرجال القطاع الخاص والمستثمرين في مصر

وتوجه الرئيس عبد الفتاح السيسي، بالشكر لكل من ساهم في خروج مشروع مجمع مصانع إنتاج الكوارتز بالعين السخنة الذي يتم افتتاحه اليوم، متابعا: “بقول تاني لرجال القطاع الخاص والمستثمرين في مصر، من فضلكم ما تضيعوش وقت تاني، وأي مشروع من اللي إحنا بنتكلم فيه، فرص نجاحه جيدة وفقا للبيانات، إحنا عندنا المادة الخام اللي ممكن تطلع من مصر ويتم تصنيع كل المراحل في مكان واحد بكل ما يعنيه ذلك لتقليل التكلفة، وبقول تاني للمستثمرين وغرف الصناعة ووزير قطاع الأعمال ووزير الصناعة والتجارة والحكومة ولينا كلنا، مانضيعش وقت تاني أكتر من كده”.

مجمع مصانع إنتاج الكوارتز

ووجه الرئيس السيسي، خلال افتتاحه مجمع مصانع إنتاج الكوارتز بالعين السخنة، حديثه لشريف عبد الحميد اللبان، رئيس مجلس إدارة شركة الشريف براند، قائلا: “من فضلكم المراحل التانية فكروا جديا ومعانا السفير الإيطالي، وممكن نتصل على أعلى مستوى مع الحكومة الإيطالية لدعم هذا الاستثمار، بحيث نخرج في أسرع وقت ممكن في إن المراحل دي تخش الإنتاج والحركة بسرعة، ومن جانبنا إحنا هنوفر المكون المصري مهما كان قيمته حتى ننطلق”.

وأكد الرئيس السيسي في حديثه لشريف عبد الحميد اللبان: “نحن ندعم الشركات ونشجع أن تقوموا وتعملوا المصانع وتساهموا في المشروعات دي، علشان نخلص المشروع امتى.. امبارح”.