الرئيس السيسى : معندناش مشكلة فى الدولار
قال الرئيس عبدالفتاح السيسي، أنه كان فيه مشكلة كبيرة في الدولار خلال الـ 3 أشهر الماضية ، لكن بقول للناس وعدنا إنه خلال شهرين هننهي تكدس البضائع في الموانئ ، وانهينا جزء كبير منها ومعندناش مشكلة في الدولار”.
أضاف الرئيس السيسي خلال كلمته امام طلبة الكلية الحربية: “القوات المسلحة بتقوم بدور مهم جدا في الفترة الصعبة دي للتخفيف على الناس البسيطة واللى ظروفها صعبة والاسعار قاسية عليها بتوزع 3 مليون كرتونة لغاية شهر رمضان للتخفيف ما امكن عن كاهل المواطنين.
وأضاف الرئيس: “الأمور الحمد لله رغم انها صعبة لكن مسيطرين عليها وهنقدر نتجاوزها ومع بعض كلنا على قلب رجل واحد كل المصريين هنقدر نتغلب ونتجاوز الفترة دي..كل ظروف صعبة بتمر على اى دولة هو اختبار لقدرة الدولة وبتبقا اختبارات لكشف المعادن على كل المستويات الداخلية والخارجية ومعادن الدنيا كلها بتظهر في الازمة وفرصة نتعرف على قدراتنا في التحمل.
واشار الرئيس: “كل محنة بتمر علينا بفضل الله بتتحول الى منحة بالإرادة والعمل والامل ان احنا نقدر نتجاوز اى مسالة بفض الله سبحانه وتعالى”.
وطمأن الرئيس عبدالفتاح السيسي المصريين، قائلا: “عاوز أطمنكم على الأوضاع في الداخل .. صحيح بنمر بظروف صعبة جدا زى ما كل الدول تقريبا بتمر بده ..وده أمر مصنعنهوش بأنفسنا ..وقلت إن إحنا مدخلناش في حروب واقتتال ضيعنا فيه قدرات الدولة المصرية ومستقبلها .. لا .. معملناش كده .. أحنا كنا حريصين في كل ردود أفعالنا أن تتسم بالتوازن والحكمة في التعامل مع كل المشاكل اللى بتقابلنا”.
وأضاف الرئيس السيسي حتى موضوع الإرهاب فرض علينا فرضا، وحرصنا من أول يوم في 2013 و 2014 أنه ميحصلش أى شكل من أشكال الصراع والاقتتال لكن كان لازم نجابه هذا الاختيار”.
وشدد الرئيس السيسي على أن الدولة تبذل جهدا كبيرا جدا للحفاظ على قدراتها، معلقا: “نقدر كلنا بالصبر.. ولازم نفهم أن ما نحن فيه هو نتاج ظروف أحنا مش سبب فيها، ولكنها ظروف دولية صعبة لها تداعيات كبيرة جدا على العالم كله، وأثرت كتير جدا على تكلفة الحياة سواء طاقة وسلع أساسية ومستلزمات إنتاج، والأسعار كلها ارتفعت في الدنيا كلها”.
وتابع الرئيس: “عندما يتساوي دخل الدولة من الدولار ومصروفها من الدولار الأمور هتبقا أحسن من كده، وده جهد بنبذله وقلت محتاجين نتحرك بسرعة ميبقاش عندنا حجم أكبر من اللى أحنا محتاجينه.. حجم الصادرات 50 مليار دولار طيب ده كفاية؟ لا مش كفاية.. بقول للشعب المصري كله .. بنعاني .. لكن الحمد لله عايشين وهنقدر نعيش وياما مرت على مصر ظروف أصعب من كده والشعب المصري بعزيمته وصبره وفهمه قدر يتجاوز الظروف دى وإن شاء الله هنتجاوزها”.
قال الرئيس عبدالفتاح السيسي، إن ما تحقق خلال العشر سنوات الماضية أمرا عظيما جدا ونفتخر به جميعا، مضيفا: “نشكر بيه ربنا سبحانه وتعالى انه حققلنا النجاح ده.. يا ترى ده حافز لينا؟ .. نعم ودافع لينا نكون جاهزين أكثر لحماية بلدنا”.
أضاف الرئيس السيسي كل ما القوات المسلحة ومؤسسات الدولة المصرية قوية هتقدر تجابه التحديات المختلفة ، واذا فرض عليها التحدي لا بقدراتها تمنع التحدى من الأصل.. فعندما تكون قادرا قويا مستعدا صدقوني ده تمن كبير قوي لمنع الصراع من أصله لأن العملية حسابية فاذا كانت الدولة قوية وقادرة بيمنع كتير من الشرور”.
